ERASMUS+ გაცვლითი პროგრამა ტუშის უნივერსიტეტში - IV საერთაშორისო ტრეინინგ-კვირეული თანამშრომლებისთვის

ტუშის უნივერსიტეტი (University of Tuscia) (ვიტერბო, იტალია) ERASMUS+ გაცვლითი პროგრამის ფარგლებში, 2024 წლის 16-20 დეკემბერს, ორგანიზებას უკეთებს IV საერთაშორისო ტრეინინგ-კვირეულს თანამშრომლებისთვის - Erasmus+ International Staff Training Week. 

საერთაშორისო კვირეულში მონაწილეობა შეუძლიათ საერთაშორისო ურთიერთობების დეპარტამენტის წარმომადგენლებს, რომელთა საქმიანობა უკავშირდება უნივერსიტეტში მიმდინარე ინტერნაციონალიზაციის პროცესებსა და საერთაშორისო თანამშრომლობის განვითარებას, უნივერსიტეტში სტუდენტებისა და თანამშრომელთა Erasmus+ მობილობის განხორციელებასთან დაკავშირებულ აქტივობებს. კვირეულის პროგრამა მოიცავს ე.წ. "მრგვალი მაგიდის" სადისკუსიო მეთოდების საშუალებით საუკეთესო პრაქტიკის გაზიარებისა და ახალი კონტაქტების დამყარებას (ნეტვორქინგი) ღონისძიებაში მონაწილე ინსტიტუტციებს შორის, ასევე, გათვალისწინებულია სოციალურ-კულტურული აქტივობები.

ტუშის უნივერსიტეტში Erasmus+ საერთაშორისო კვირეულში მონაწილეობის მისაღებად სტუ-ს საერთაშორისო ურთიერთობების დეპარტამენტის წარმომადგენლებისთვის აუცილებელია კოორდინატორი უნივერსიტეტის მიერ მოთხოვნილი საბუთების წარდგენა მიმდინარე წლის 15 ნოემბრამდე. კანდიდატების შერჩევის პროცესს სრულად განახორციელებს კოორდინატორი უნივერსიტეტი. სტუ-ს საერთაშორისო ურთიერთობების დეპარტამენტის ადმინისტრაციული პერსონალის მობილობა განხორციელდება ტუშის უნივერსიტეტიდან თანხმობის მიღების შემთხვევაში, 2024 წლის 16-20 დეკემბერს.

უნივერსიტეტებს შორის გაფორმებული ინტერინსტიტუციური ხელშეკრულებით განსაზღვრულია 4 ადმინისტრაციული თანამშრომლის მობილობა საქართველოს ტექნიკური უნივერსიტეტიდან ტუშის უნივერსიტეტში.

მიზნობრივი ჯგუფი: საერთაშორისო ურთიერთობათა დეპარტამენტი.