სტუ-ის სტუდენტებმა, 16-დან 20 სექტემბრის ჩათვლით, „ახალგაზრდობა და ვეტერანები ეროვნული თავდაცვისა და უსაფრთხოებისთვის“ მიერ ორგანიზებულ, სამხედრო-სასწავლო ღონისძიების გომბორის სასწავლო ცენტრში, ტრენინგები გაიარეს. 

გომბორის სასწავლო ცენტრში მოხალისეები გადიან სპეციალურ მომზადებას უნიკალურ და მოთხოვნად სპეციალობებში; ასევე ესწრებიან ლექციებს შეიარაღებული კონფლიქტების სამართლის, გეოპოლიტიკის, სამხედრო ისტორიის, საინფორმაციო-ფსიქოლოგიური ოპერაციებისა და მიმდინარე შეიარაღებული კონფლიქტების შესახებ.

გადიან სწავლებას საცეცხლე ოპერაციებსა და სროლაში, სახმელეთო ნავიგაციასა და საინჟინრო მომზადებაში; აქვთ შესაძლებლობა დაესწრონ სპეციალურ კურსს პირველად სამედიცინო დახმარებაზე, საგანგებო სიტუაციებში რეაგირებასა და კავშირგაბმულობაზე. სწავლობენ საველე მომზადებას, ექსტრემალურ ვითარებაში თვითგადარჩენის ხერხებსა და მეთოდებზე. 

მოხალისე სტუდენტებისთვის ცენტრში უზრუნველყოფილია კომფორტული და კარგად აღჭურვილი ინფრასტრუქტურა, ამიტომ თავისუფალ დროს ტერიტორიაზევე აქვთ დასვენების, სპორტული აქტივობისა და გართობის შესაძლებლობა. 

გომბორის სასწავლო ცენტრის შემდგომ ნაკადში მონაწილეობის მსურველ სტუდენტებს, რეგისტრაციისთვის შეუძლიათ მიმართონ, როგორც საქართველოს ტექნიკური უნივერსიტეტის სტუდენტურ თვითმმართველობასა და სტუდენტური სერვისების, კულტურისა და სპორტის დეპარტამენტს, ისე ფაკულტეტების სტუდენტურ თვითმმართველობებს. ასევე შეავსონ სარეგისტრაციო ფორმა.

ცნობისათვის, გომბორის სასწავლო ცენტრი თავდაცვის სამინისტროსთან არსებული ორგანიზაციაა, რომელიც 2023 წელს საქართველოს თავდაცვის სამინისტრომ, ვეტერანების საქმეთა სახელმწიფო სამსახურმა და გენერალთა კლუბმა ერთობლივად დააფუძნა. 

სასწავლო ცენტრი ემყარება თავდაცვის კოდექსის XVII თავს - „თავდაცვის სფეროში მოხალისეობა“ (საქართველოს კანონი).

სასწავლო ცენტრის მიზანია, ქვეყნის თავდაცვისუნარიანობის ამაღლებისა და ეროვნული უსაფრთხოების უზრუნველყოფის მიზნით, ნებაყოფლობით საწყისებზე, აქტიური და მოტივირებული მოქალაქეების არაპოლიტიკური სტრუქტურირებული ერთობის შექმნა.