საქართველოს ტექნიკური უნივერსიტეტის ინფორმატიკისა და მართვის სისტემების ფაკულტეტის საინჟინრო ფიზიკის დეპარტამენტის მეცნიერებმა, პაატა კერვალიშვილმა და თამარ ბერბერაშვილმა, იაპონიის ქალაქ ოსაკაში გამართულ საერთაშორისო გამოფენაზე (World Expo 2024 in Osaka, Japan) სხვადასხვა ქვეყნის მეცნიერებსა და ვიზიტორებს სტუ-ის საინჟინრო ფიზიკის დეპარტამენტის მკვლევართა მიერ განხორციელებული უნიკალური, მაღალტექნოლოგიური კვლევების შესახებ პრეზენტაციები წარუდგინეს. 

ოსაკას მსოფლიო ექსპოზე, რომელიც თანამედროვე ენერგეტიკული ტექნოლოგიების განვითარებასა და „მწვანე ტრანსფორმაციასთან“ დაკავშირებულ ინოვაციურ გადაწყვეტილებათა წარმოჩენას ეძღვნებოდა, საქართველოს ტექნიკური უნივერსიტეტის საინჟინრო ფიზიკის დეპარტამენტის მეცნიერები გამოფენის ორგანიზატორთა სპეციალური მიწვევით იმყოფებოდნენ. 

როგორც სტუ-ის საინჟინრო ფიზიკის დეპარტამენტის პროფესორი პაატა კერვალიშვილი აღნიშნავს, საქართველოს ტექნიკური უნივერსიტეტი ოსაკას გამოფენაზე წარსდგა უნიკალური კვლევებით, რომლებიც მოიცავს ლაზერულ-პლაზმურ მეთოდზე დაფუძნებული მზის ელემენტების მიღების ტექნოლოგიებს, ლაზერულ-ბირთვული სინთეზის (პროტონ-ბორი) მნიშვნელოვანი ელემენტების შექმნას, სპინტრონული და სპინქუბიტური ელემენტების წარმოებასა და ოპტიკური (ლაზერული) სპექტრომეტრიის ვიბრაციულ-რეზონანსული მეთოდების გამოყენება-განვითარებას ბიოსამედიცინო მიმართულებით. 

„აღსანიშნავია, რომ ოსაკას მსოფლიო გამოფენაზე, იაპონიის სამთავრობო ორგანიზაციების მხარდაჭერით, საქართველოს ტექნიკური უნივერსიტეტი აღჭურვილი იყო სპეციალური საგამოფენო სივრცით. სამი დღის განმავლობაში, პროფესორ თამარ ბერბერაშვილთან ერთად, შესაძლებლობა გვქონდა შევხვედროდით მეცნიერებს, ექსპერტებს, ბიზნესსექტორისა და სამედიცინო დარგის წარმომადგენლებს, ჩაგვეტარებინა საინტერესო პრეზენტაციები და საუბრები იმ უნიკალური და მაღალტექნოლოგიური კვლევების შესახებ, რომლებსაც ჩვენს უნივერსიტეტში საინჟინრო ფიზიკის დეპარტამენტის მეცნიერთა ჯგუფი ვახორციელებთ. კერძოდ, ყურადღება გავამახვილეთ ლაზერული გამოსხივებით ინდუცირებული პლაზმის მეშვეობით სილიციუმ-გრაფენის და სხვა ნანოსისტემებისა და ნანომოწყობილობების მიღების კონცეფციებსა და ტექნოლოგიებზე. ასევე, დამთვალიერებელს გავაცანით ჩვენ მიერ თანამედროვე ინფორმაციულ-ტექნოლოგიური მიდგომების გამოყენებით შექმნილი ბიონანოსისტემების კვლევის ლაზერულ-რეზონანსული მეთოდები და ვიბრაციული სპექტროსკოპიის მულტიდისციპლინური დამუშავებები.

სასიხარულოა, რომ ოსაკას ექსპოზე საქართველოს ტექნიკური უნივერსიტეტის პავილიონის ვიზიტორები დიდი ინტერესით გაეცნენ ინფორმაციას უნივერსიტეტისა და მის მეცნიერთა ბოლოდროინდელ მიღწევებზე, ასევე, ჩვენი ქვეყნის მრავალმხრივ ინოვაციურ პოტენციალზე, განსაკუთრებით განათლებისა და მეცნიერების სფეროში. არანაკლებ მნიშვნელოვანია, რომ უახლოეს მომავალში ვგეგმავთ იაპონურ-ქართული კონფერენციების ციკლის მოწყობას და გარდა ამისა, იაპონელ კოლეგებთან კოლაბორაციით, ერთობლივი კვლევითი პროექტების შექმნაზე დავიწყებთ მუშაობას“, - ამბობს პაატა კერვალიშვილი. 

ცნობისათვის, იაპონიაში, ოსაკას ექსპოზე, მსოფლიო მასშტაბით, წარმოდგენილი იყო 1200-ზე მეტი მოწინავე და უახლესი ტექნოლოგიური მიღწევა, რომელიც 20 ათასზე მეტმა ვიზიტორმა დაათვალიერა.