საქართველოს ტექნიკური უნივერსიტეტის რექტორი, აკადემიკოსი დავით გურგენიძე „არემჯის“ ხელმძღვანელობასა და თანამშრომლებს, უნივერსიტეტის სახელით, კომპანიის მიერ დაწესებულ სამთოელის პროფესიულ დღეს ულოცავს.

როგორც საქართველოს ტექნიკური უნივერსიტეტის რექტორი თავის მიმართვაში აღნიშნავს, კომპანიაში დასაქმებულთა დიდი უმრავლესობა საქართველოს ტექნიკური უნივერსიტეტის კურსდამთავრებულია, რომლებიც თავდაუზოგავად შრომობენ ქვეყნის უკეთესი მომავლისთვის.

„საქართველოს ტექნიკური უნივერსიტეტისა და სამთო-გეოლოგიური ფაკულტეტის სახელით, ჩვენი ქვეყნის ერთ-ერთ უმსხვილეს კომპანიას, „არემჯი ჯგუფს“, მის თანამშრომლებსა და ხელმძღვანელს, ბატონ ჯონი შუბითიძეს ვულოცავთ სამთოელის დღეს, მადლობას ვუხდით ამ ურთულესი პროფესიის დაფასებისა და სამთოელის დღის დაწესებისთვის. კომპანიის წარმატება სამთოელთა თავდაუზოგავი საქმიანობის შედეგია, სწორედ იმ სამთოელთა, რომლებიც საქართველოს ტექნიკური უნივერსიტეტის აღზრდილები და კურსდამთავრებულები არიან. უნივერსიტეტისთვის მისასალმებელია, როდესაც კომპანიის მენეჯმენტი ასე აფასებს დასაქმებულთა ძალისხმევას, ერთგულებას და სამთოელის პროფესიულ დღეს, ტრადიციულად, საზეიმოდ აღნიშნავს.

კომპანიის დაფუძნებიდან 11 წლის მანძილზე, საქართველოს ტექნიკურ უნივერსიტეტს, როგორც საინჟინრო-ტექნოლოგიურ დარგებში ფლაგმან უმაღლეს სკოლას და „არემჯის“, როგორც სამთო-გეოლოგიის დარგის ფლაგმან ორგანიზაციას, ერთმანეთთან მჭიდრო საქმიანი და მეგობრული ურთიერთობები აკავშირებთ. „არემჯი“ ჩვენი უნივერსიტეტის ერთ-ერთი საუკეთესო პარტნიორია და მისი წვლილი უმნიშვნელოვანესი და მრავალმხრივია საუნივერსიტეტო ცხოვრებაში, უპირველეს ყოვლისა - სტუდენტებისა და კურსდამთავრებულთა დასაქმება-სტაჟირების, მათთვის საველე პრაქტიკებისა და საზაფხულო სკოლების ორგანიზების, რომელშიც ბოლო ოთხი წლის მანძილზე ჩვენი 150 სტუდენტი იყო ჩართული, სასტიპენდიო პროგრამების ამოქმედების, რომლის ფარგლებშიც სტიპენდია ჩვენმა 100-მდე სტუდენტმა მოიპოვა, დარგისთვის საჭირო თანამედროვე პროგრამების შესწავლის, ასევე, საუნივერსიტეტო ლაბორატორიული ბაზების შექმნა-გადაიარაღების, სამეცნიერო-კვლევითი საქმიანობისა და ინფრასტრუქტურული მხარდაჭერის მიმართულებით. თავის მხრივ, საქართველოს ტექნიკური უნივერსიტეტი კომპანიისთვის ამზადებს ახალგაზრდა კვალიფიციურ სპეციალისტებს სამთო საქმესა და გეოლოგიაში, შრომის უსაფრთხოებასა და საინჟინრო გეოდეზია-მარკშეიდერიაში, მექანიკის ინჟინერიასა და ქიმია-მეტალურგიაში, ენერგეტიკასა და მართვის ავტომატიზაციაში, ხელს უწყობს თანამშრომელთა გადამზადებაში. მხოლოდ ბოლო ოთხი წლის განმავლობაში „არემჯის“ გუნდის წევრი საქართველოს ტექნიკური უნივერსიტეტის 120-ზე მეტი სტუდენტი და კურსდამთავრებული გახდა.

კიდევ ერთხელ ვულოცავთ „არემჯის“ საინჟინრო კორპუსს, ჩვენს კურსდამთავრებულებსა და სტუდენტებს პროფესიულ დღეს. შემთხვევითი არ არის, რომ სამთოელის დღე 17 დეკემბერს,  აღინიშნება - წმინდა დიდმოწამე ბარბარე ყოფილიყოს ყველა სამთოელის მფარველი!“, - აღნიშნულია საქართველოს ტექნიკური უნივერსიტეტის რექტორის მილოცვაში.