ცნობილ პედაგოგს, მეცნიერს, თაობათა აღმზრდელსა და მათთვის ცხოვრების გზის გამკვალავს, ღირსეულ ადამიანს, ჭეშმარიტ ინტელიგენტს - პროფესორ ბორის იმნაძეს დღეს 90 წელი შეუსრულდებოდა.
ბატონი ბორისი პასუხისმგებლობისა და მოვალეობის ღრმა შეგნებით ერთგულებდა უნივერსიტეტსა და ქვეყანას - უხმოდ, უპრეტენზიოდ, სანაცვლო პატივისცემის მოლოდინის გარეშე.
მან ცხოვრების გრძელი და საინტერესო გზა განვლო. ეს გზა არ ყოფილა ყოველთვის ია-ვარდით მოფენილი - შუქ-ჩრდილებიც ახლდა, თუმცა მას მუდამ გამოარჩევდა ზნეობრივი სიწრფელე და სისპეტაკე, საკუთარი მოვალეობის აღსრულების ხიბლი და არამც - თვითკმაყოფილების სიამოვნება. ამ ცნობიერებით ცხოვრობდა და ამ შეგნებით ემსახურებოდა საკუთარ ერსა და ქვეყანას.
არც იმის თქმა შეიძლება, რომ ქართველ საზოგადოებას შეუმჩნეველი დარჩა ბატონი ბორისის ღვაწლი და ამას მისი რეგალიებიც მოწმობს: პროფესორი ბორის იმნაძე დაჯილდოებულია „ღირსების ორდენითა“ და მედლებით; ის იყო საქართველოს განათლების მეცნიერებათა აკადემიის აკადემიკოსი; პედაგოგიკის მეცნიერებათა დოქტორი, პროფესორი; საქართველოს ტექნიკური უნივერსიტეტის რუსული ენის, ლიტერატურისა და ჟურნალისტიკის მიმართულების ხელმძღვანელი; სტუ-ის სამეცნიერო ჟურნალ „განათლების“ რედაქტორი; სტუ-ის საინჟინრო ეკონომიკის, მედიატექნოლოგიებისა და სოციალურ მეცნიერებათა ფაკულტეტის სამეცნიერო საბჭოს წევრი.
2018 წლიდან კი, პროფესორ ბორის იმნაძის სახელობის აუდიტორია საქართველოს ტექნიკური უნივერსიტეტის საინჟინრო ეკონომიკის, მედიატექნოლოგიებისა და სოციალურ მეცნიერებათა ფაკულტეტზე ფუნქციონირებს.
