ფაკულტეტის გამოყენებითი გეოლოგიის მაგისტრანტმა ატომური ენერგიის საერთაშორისო სააგენტოში (IAEA) სტაჟირება წარმატებით დაასრულა
საქართველოს ტექნიკური უნივერსიტეტის სამთო-გეოლოგიური და მთის მდგრადი განვითარების ფაკულტეტის, გამოყენებითი გეოლოგიის სამაგისტრო პროგრამის II კურსის სტუდენტმა, ელენე ჩიკვილაძემ, 2025-2026 წლებში ავსტრიაში, ატომური ენერგიის საერთაშორისო სააგენტოს (IAEA) ბირთვული მეცნიერებებისა და გამოყენების დეპარტამენტის (NAPC) (ავსტრია, ვენა) იზოტოპური ჰიდროლოგიის სექციაში (IHS) ერთწლიანი პროფესიული სტაჟირება გაიარა.
მისი წარმატების მთავარი საფუძველი 2024 წელს IAEA-ში გავლილი ჰიდროლოგიური მოდელირების ორეტაპიანი ტრენინგი და სამაგისტრო ნაშრომის ფარგლებში რადონ-222-ის კვლევაზე ფოკუსირება გახდა.
ძირითადი სამეცნიერო მიღწევები და ინოვაციური შედეგები:
1. საქართველოში პირველი იზოტოპური ჰიდროლოგიური მოდელი: მკვლევარმა შეისწავლა მდინარე ალაზნის აუზი და შექმნა საქართველოში პირველი იზოტოპური მონაცემებით გაძლიერებული JAMS/J2000 წყლის ბალანსის ჰიდროლოგიური მოდელი. პროცესში დამუშავდა მეტეოროლოგიური, იზოტოპური, ჰიდროლოგიური, თანამგზავრული და კლიმატური მონაცემები.
2. რადონ-222-ის ინტეგრირების კონცეფცია: ტრიტიუმის, რადონ-222-ისა და წყლის სტაბილური იზოტოპების მონაცემებზე დაყრდნობით, შემუშავდა სინჯების აღების გეგმა/სახელმძღვანელო და შეიქმნა ინოვაციური კონცეფცია რადონ-222-ის ჰიდროლოგიურ მოდელში ინტეგრირებისთვის.
3. პროგრამული უზრუნველყოფა (Python Pipeline): Python-ზე შემუშავდა მონაცემთა დამუშავების ავტომატიზებული პაიპლაინი, რომელიც JAMS/J2000-ის მომხმარებლებსა და მკვლევარებს მოდელირების შედეგების მრავალმხრივ ანალიზში დაეხმარება.
საერთაშორისო აქტივობები და პუბლიკაციები:
• საერთაშორისო თანაავტორობა: მაღალრეიტინგული სამეცნიერო სტატიის — „Prediction of Hydroclimatic Anomalies Using a New Isotope Precipitation Index“ თანაავტორი (doi.org/10.1029/2025GL120780).
• IAEA-ს 69-ე გენერალური კონფერენცია: მონაწილეობა გენერალური კონფერენციის ღონისძიებებსა და სამეცნიერო ფორუმზე „ატომები წყლისთვის“.
• აკადემიური მხარდაჭერა და ასისტირება: ასისტირებას უწევდა IAEA-ს საერთაშორისო ტრენინგებს და ჰიდროლოგიურ მოდელირებაში ეხმარებოდა უცხოელ მაგისტრანტებსა და დოქტორანტებს.
კვლევის პროცესში აქტიურად თანამშრომლობდა სტუ-ს გამოყენებითი გეოლოგიის დეპარტამენტის, თსუ-ს მიხეილ ნოდიას სახელობის გეოფიზიკის ინსტიტუტისა და IAEA-ს საერთაშორისო ექსპერტებთან.
სტაჟირების დასასრულს, მან კვლევის შემაჯამებელი ანგარიში წარადგინა როგორც იზოტოპური ჰიდროლოგიის სექციაში, ისე ჰიდროლოგიური მოდელირების კოორდინირებული კვლევითი პროექტის (CRP) შეხვედრაზე.
ვულოცავთ ელენეს ამ უმნიშვნელოვანეს საერთაშორისო აღიარებას და ვუსურვებთ შემდგომ პროფესიულ და სამეცნიერო წარმატებებს!ფაკულტეტის სტუდენტმა რაჭაში საველე-გეოლოგიური კვლევა ჩაატარა
საქართველოს ტექნიკური უნივერსიტეტის სამთო-გეოლოგიური და მთის მდგრადი განვითარების ფაკულტეტის, სამთო და გეოინჟინერიის პროგრამის IV კურსის სტუდენტმა რატი რაჭველიშვილმა, გეოლოგიის დეპარტამენტის მიერ ორგანიზებულ სამეცნიერო კონფერენციაში გამარჯვების შედეგად მოპოვებული დაფინანსებით, რაჭის რეგიონში საველე-გეოლოგიური კვლევა წარმატებით განახორციელა.
კვლევის თემა: „რაჭის რეგიონში (კრიხის მიმდებარე ტერიტორია) ზედა ცარცული ნალექების ბიოსტრატიგრაფიული კვლევა“
კვლევის არეალი და გეოლოგიური აგებულება:
საველე სამუშაოები ჩატარდა ამბროლაურის მუნიციპალიტეტის სოფელ კრიხის მიმდებარედ. ე. გამყრელიძის ტექტონიკური დარაიონების სქემის (2013) მიხედვით, აღნიშნული ტერიტორია მიეკუთვნება გაგრა-ჯავის ზონის რაჭის დაძირვის ქვეზონას, ხოლო ფაციალური კომპლექსების მიხედვით - აფხაზეთ-რაჭის სტრუქტურულ-ფაციალურ ტიპს (ღამბაშიძე, 1979). ჭრილი წარმოდგენილია კარბონატული ნალექებით - ღია ნაცრისფერი, თეთრი და მოყვითალო შეფერილობის კირქვებითა და მერგელებით.
საველე სამუშაოები და მეთოდოლოგია:
საველე ეტაპზე განხორციელდა საკვლევი ჭრილის დეტალური დოკუმენტირება, GPS კოორდინატების დაფიქსირება და ფოტოგადაღება; ლითოლოგიური აღწერა, შრეების სიმძლავრისა და სტრუქტურული ელემენტების (მიმართება, დაქანება, დახრის კუთხე) გაზომვა გეოლოგიური კომპასით; ქანების ნიმუშების სისტემატური სინჯვა 50-100 სმ ინტერვალით; მაკროფაუნისტური ნაშთების (ამონიტები, ბელემნიტები, ბრაქიოპოდები) გამოვლენა და დაფიქსირება.
სამეცნიერო მიზანი და მოსალოდნელი შედეგები:
შეგროვებული მასალის საფუძველზე, ლაბორატორიულ პირობებში იგეგმება მიკროფაუნის (განსაკუთრებით პლანქტონური ფორამინიფერების: Muricohedbergella, Marginotruncana, Globotruncana) გამოყოფა და დეტალური შესწავლა.
კვლევის საბოლოო მიზანია - ჭრილის დეტალური ბიოსტრატიგრაფიული დანაწილება და ზონური ერთეულების გამოყოფა; რეგიონის პალეოგეოგრაფიული და პალეოკლიმატური სურათის აღდგენა; ობიექტის მეცნიერული, საგანმანათლებლო და გეოტურისტული პოტენციალის (გეომემკვიდრეობის) შეფასება.
ჩატარებული საველე სამუშაოები მყარ საფუძველს ქმნის რაჭის ტერიტორიაზე ცარცული ნალექების შემდგომი, უფრო მასშტაბური და მიზანმიმართული შესწავლისათვის.