სამთო-გეოლოგიური ფაკულტეტის ისტორია
ფაკულტეტის ისტორია იწყება 1922 წლის 16 იანვარს, როდესაც თბილისის უნივერსიტეტის პროფესორთა საბჭოს გადაწყვეტილების საფუძველზე პოლიტექნიკური ფაკულტეტი გაიხსნა.
პოლიტექნიკურ ფაკულტეტზე თავდაპირველად სამი განყოფილება იყო: სამშენებლო, მექანიკური და სამთამადნო. სამთამადნო განყოფილებას გააჩნდა სპეციალობები - სამთო (საექსპლუატაციო), მეტალურგიული და ქიმიურ-ტექნოლოგიური.
1928 წლის 1 ოქტომბერს საქართველოს ხელისუფლების გადაწყვეტილებით თბილისის უნივერსიტეტის პოლიტექნიკური ფაკულტეტის ბაზაზე გაიხსნა საქართველოს სახელმწიფო პოლიტექნიკური ინსტიტუტი, რომელსაც დასაწყისში გააჩნდა შემდეგი ფაკულტეტები: I. სამშენებლო ფაკულტეტი, II. მექანიკური ფაკულტეტი, III. სამთო-ქიმიური ფაკულტეტი. სამთო ფაკულტეტის დეკანად დაინიშნა გრიგოლ წულუკიძე.
1930 წელს ჩატარებული საქართველოს უმაღლესი სასწავლებლების რეორგანიზაციის შედეგად საქართველოს პოლიტექნიკური ინსტიტუტის ბაზაზე შეიქმნა ექვსი ინსტიტუტი. 1932 წელს შეიქმნა ამიერკავკასიის სამთო-ქიმიური ინსტიტუტი. 1933 წელს სამთო-ქიმიური, საინჟინრო-სამშენებლო და ენერგეტიკული ინსტიტუტები გაერთიანდნენ ამიერკავკასიის ინდუსტრიული ინსტიტუტის სახელწოდებით.
1947 წელს ინსტიტუტს საქართველოს პოლიტექნიკური ინსტიტუტის სახელი მიენიჭა. ინსტიტუტში იმ დროს არსებულ 6 ფაკულტეტს შორის იყო სამთო ფაკულტეტი.
1972 წელს, როდესაც საქართველოს პოლიტექნიკური ინსტიტუტის 50 წლისთავი აღინიშნა ინსტიტუტში ფუნქციონირებდა 28 ფაკულტეტი, მათ შორის: სამთო ფაკულტეტი, სადაც სწავლება მიმდინარეობდა ექვსი სპეციალობით, ხოლო გეოლოგიურ ფაკულტეტზე სწავლება მიმდინარეობდა ოთხი სპეციალობით.
სამთო ფაკულტეტის დეკანებად სხვადასხვა დროს მუშაობდნენ: რ. ჯიქია, კ. გაბუნია, გ. ჩხეიძე, გ. ქართველიშვილი, ბ. აბესაძე, ნ. ტყემალაძე, დ. შერვაშიძე, ა. ლალიევი, გ. ჯაფარიძე.
1955 წელს ფაკულტეტს სამთო-გეოლოგიური ეწოდა. 1971 წლიდან 1992 წლამდე სამთო და გეოლოგიური ფაკულტეტები ცალ-ცალკე არსებობდნენ, ხოლო 1992 წელს კვლავ გაერთიანდნენ. ამ პერიოდში სამთო ფაკულტეტის დეკანები იყვნენ დ. ბეჟაშვილი, ბ. დემეტრაძე, გ. ბუცხრიკიძე; გეოლოგიური ფაკულტეტისა - გ. ჯაფარიძე, ვ. ჭუმბურიძე, თ. ლორთქიფანიძე, ზ. მგელაძე. გაერთიანებული სამთო-გეოლოგიური ფაკულტეტის დეკანად არჩეული იყო ზ. მგელაძე. 2005- 2025 წლებში ფაკულტეტის დეკანი იყო ა. აბშილავა,ხოლო 2025 წლიდან თ. კუნჭულია.
2010 წლის 3 ნოემბრის საქართველოს მთავრობის #333 დადგენილების საფუძველზე ფაკულტეტის შემადგენლობაში შეიქმნა საქართველოს ტექნიკური უნივერსიტეტის სამთო-გეოლოგიური ფაკულტეტის ტყიბულის სამთო-ტექნოლოგიური ინსტიტუტი, რომელმაც ფუნქციონირება დაიწყო 2011 წლიდან. ინსტიტუტში ხდება პროფესიული საგანმანათლებლო პროგრამებით სპეციალისტების მომზადება სამთო-გეოლოგიური და სამშენებლო სფეროში.
2025 წლიდან სტუ-ს აკადემიური საბჭოს # 01-05 -/154 დადგენილების საფუძველზე ფაკულტეტი გაერთიანდა მთის მდგრადი განვითარების ფაკულტეტთან , რომელიც შექმნილი იყო საქართველოს მთავრობის 2019 წლის 4 აპრილის #751 განკარგულებისა და საქართველოს ტექნიკური უნივერსიტეტის აკადემიური საბჭოს 2021 წლის 7 დეკემბრის #01-05-04/189 დადგენილების საფუძველზე და რომელიც უზრუნველყოფდა მაღალმთიანი რეგიონებისათვის მთისმცოდნე, მდგრადი განვითარების ტრანსდისციპლინური ცოდნით აღჭურვილი ახალგაზრდა ექპერტ-პროფესიონალი კადრების მომზადებას. გაერთიანებულ ფაკულტეტს ეწოდა ‘’სამთო-გეოლოგიური და მთის მდგრადი განვითარების ფაკულტეტი’’.
ფაკულტეტის დეკანად არჩეული იქნა ნ. ხოზრევანიძე.
ამჟამად ფაკულტეტზე სწავლა მინდინარეობს სწავლების სამივე საფეხურზე (ბაკალავრიატი, მაგისტრატურა, დოქტორანტურა), აგრეთვე პროფესიულ საგანმანათლებლო პროგრამებზე.