სარკინიგზო ტრანსპორტის სააგენტო სტუდენტებისა და კურსდამთავრებულებისთვის სტაჟირების პროგრამას აცხადებს

საქართველოს ეკონომიკისა და მდგრადი განვითარების სამინისტროს სისტემაში შემავალი სსიპ სარკინიგზო ტრანსპორტის სააგენტო  სტუდენტებისა და კურსდამთავრებულებისთვის სტაჟირების პროგრამას იწყებს.

პროგრამაში მონაწილეობის მიღება შეუძლიათ პირებს, რომლებიც სწავლობენ: 

• უმაღლესი განათლების პირველ საფეხურზე (ბაკალავრიატი) - მხოლოდ დამამთავრებელი სასწავლო წლის შემთხვევაში;

• უმაღლესი განათლების მე-2 ან მე-3 საფეხურზე (მაგისტრატურა / დოქტორანტურა);

• ან დასრულებული აქვთ უმაღლესი განათლების ერთ-ერთი საფეხური (არიან კურსდამთავრებულები).

კონკურსის წესით შერჩეულ კანდიდატებს შესაძლებლობა ექნებათ პრაქტიკული გამოცდილება მიიღონ შემდეგ დეპარტამენტებში:

• სარკინიგზო უსაფრთხოების დეპარტამენტის სტაჟიორი

• სარკინიგზო თავსებადობის დეპარტამენტის სტაჟიორი

• იურიდიული დეპარტამენტის სტაჟიორი

სააგენტოს შესახებ: სარკინიგზო ტრანსპორტის სააგენტო 2023 წლის 1 ივლისს, საქართველოსა და ევროკავშირს შორის გაფორმებული ასოცირების შესახებ შეთანხმებით გათვალისწინებული ევროკავშირის სამართლებრივ აქტებთან დაახლოებისა და სარკინიგზო ტრანსპორტის დარგის რეფორმის ფარგლებში შეიქმნა („ტრანსპორტის სფეროს მართვისა და რეგულირების შესახებ“ და „საჯარო სამართლის იურიდიული პირის შესახებ“ საქართველოს კანონების საფუძველზე).

სააგენტოს მიზანია სარკინიგზო უსაფრთხოების უზრუნველყოფა, სფეროს ტექნიკური რეგულირება, ზედამხედველობა და საერთაშორისო სტანდარტების დანერგვა.

სტაჟირების პროგრამა მონაწილეებს სთავაზობს უნიკალურ შანსს, ჩაერთონ ქვეყნისთვის სტრატეგიულად მნიშვნელოვანი და ევროპულ სტანდარტებთან დაახლოებული უწყების საქმიანობაში და განივითარონ პროფესიული უნარები.

განაცხადები მიიღება ვებგვერდის მეშვეობით 17 ივნისის ჩათვლით.