კომპანია “ავტობანის” დამფუძნებელი ფაკულტეტის სტუდენტებს შეხვდა
5 ოქტომბერს, სატრანსპორტო სისტემებისა და მექანიკის ინჟინერიის ფაკულტეტის ბაკალავრიატის სტუდენტებს, კომპანია “ავტობანის” დამფუძნებელი და ნარჩენების მართვის ბიზნეს ასოციაციის პრეზიდენტი ბაკურ ხუნდაძე შეხვდა.
შეხვედრის მიზანს, კომპანია “ავტობანის” და ნარჩენების მართვის ბიზნეს ასოციაციის მუშაობის შესახებ ინფორმაციის გაზიარება წარმოადგენდა.
ბაკურ ხუნდაძე სტუდენტებს კომპანიის დაფუძნების ისტორიაზე, საწარმოო პროცესზე, გაყიდვების სამსახურის, სასაწყობე სივრცის, ავტომობილების სარემონტო სერვისის და ნარჩენების შემგროვებელი საცავის მუშაობის პრინციპებზე ესაუბრა, ასევე, თუ როგორ ახორციელებს ნარჩენების მართვის ბიზნესს ასოციაცია - ნარჩენი ზეთების, საბურავებისა და აკუმულატორების მართვის მწარმოებლის გაფართოებული ვალდებულების კოლექტიური ორგანიზაციის ფუნქციებს.
სტუდენტებმა საინტერესო ინფორმაცია მიიღეს გარემოს დაცვის და სხვადასხვა ნარჩენის შეგროვება-გადამუშავების საკითხების შესახებ.
კომპანია “ავტობანი” 27 წელია წარმოადგენს დამაკავშირებელ რგოლს მსოფლიო ავტომწარმოებლებსა და საქართველოს მომხმარებლებს შორის.
მის ძირითად საქმიანობას წარმოადგენს ორიგინალი ხარისხის ავტონაწილებისა და პრემიალური კლასის ნავთობპროდუქტების იმპორტი და რეალიზაცია. “ავტობანი” ნარჩენების მართვის ბიზნეს ასოციაციის დამფუძნებელი კომპანიაა. ასოციაციის მიზანია, ავტოინდუსტრიაში დაინერგოს ნარჩენების მართვის თანამედროვე პრაქტიკა.
ფაკულტეტის ადმინისტრაცია მადლობას ვუხდით კომპანია “ავტობანის” მენეჯმენტს აქტიური თანამშრომლობისთვის და მზადყოფნას გამოვთქვამთ აქტიურად გავაგრძელოთ თანამშრომლობა სტუდენტთა და კურსდამთავრებულთა საუკეთესო ინტერესებისათვის.