ქიმიის დეპარტამენტი შეიქმნა 2017 წელს. დეპარტამენტს ხელმძღვანელობს ქიმიის მეცნიერებათა დოქტორი, პროფესორი მაია ცინცაძე. მისამართი: ოთახი 200, II სასწავლო კორპუსი, ტელეფონი: 0322 77 11 11 (7365), ელ ფოსტა: m.tsintsadze@gtu.ge
დეპარტამენტში მოღვაწეობს 7 პროფესორი, 14 ასოცირებული პროფესორი, 8 ასისტენტ-პროფესორი.
დეპარტამენტის შესაბამისი მიმართულებებია:
დეპარტამენტის ისტორიაში უმნიშვნელოვანესია აკადემიკოს გ. ცინცაძის როლი. იგი ქართული ინტელიგენციის იმ პლეადას მიეკუთვნება, რომელმაც გასული საუკუნის ორმოცდაათიან წლებში გაბედულად შემოაბიჯა სამეცნიერო-კვლევით ასპარეზზე და მას შემდეგ ათეული წლები თავდადებით იღწვოდა მეცნიერების წინსვლისა და განვითარებისათვის, მაღალი კომპეტენციის მქონე საინჟინრო კადრების აღზრდისა და ჩამოყალიბებისათვის. გ.ცინცაძე დიდ ყურადღებას უთმობდა საქართველოს მრეწველობაში ახალი ტექნოლოგიების დანერგვის საკითხებს, მონაწილეობდა სტიბიუმის სულფიდის მიღების ტექნოლოგიის დამუშავებასა და ამ ტექნოლოგიის რაჭის სამთოქიმიურ ქარხანაში დანერგვის პროცესში. გ. ცინცაძემ დაამუშავა მადნეულის საბადოს მადანში ოქროსა და პალადიუმის განსაზღვრის მოდიფიცირებული მეთოდიკა. აქვე უნდა აღინიშნოს მისი სამუშაოები ინდიუმისა და კადმიუმის სორბციული ქცევის შესახებ სამამულო ანიონიტების როდანიდულ ფორმებზე. ამ კვლევების შედეგად შეიქმნა წინაპირობები რიგი იშვიათი ლითონების დაყოფისა და გამოყენებისათვის.
დეპარტამენტში განხორციელებულია რიგი სხვადასხვა ბიოლოგიურად აქტიური ნივთიერებებისა და კომპლექსური ნაერთების სინთეზი, მათი ფიზიკურ-ქიმიური თვისებების კვლევა და ბიოლოგიური აქტიურობის დადგენა. გრძელდება სამუშაოები სპილენძის, რკინის, თუთიის, კადმიუმის, კობალტის, ნიკელის, გალიუმის, ტყვიის, კალის, ლანთანოიდების, გერმანიუმის, სილიციუმის, მანგანუმის და სხვა იშვიათი და გარდამავალი მეტალებისა და სხვადასხვა ორგანული ლიგანდების (ამინების, ამიდების, ჰიდრაზიდების, ჰიდრაზონების, დიამიდების, ჰეტეროციკლურ კონდენსირებულბირთვიანი ლიგანდების) კოორდინაციული ნაერთების მისაღებად და მათი ფიზიკურ-ქიმიური თვისებების შესწავლა. მიმდინარეობს სინთეზირებული კოორდინაციული ნაერთების ბიოლოგიური თვისებების შესწავლა, კერძოდ, ბიოაქტიური სამკურნალო პრეპარატების საფუძველზე მათი როლის გარკვევა სხვადასხვა დაავადებების მკურნალობისთვის (ტუბერკულოზი, გულსისხლძარღვთა და სიმსივნური დაავადებები და ა.შ.)
მრავლობითი წრფივი რეგრესიის მეთოდით შემუშავებულია ორ- და სამკომპონენტიან ნარევებში სასურველი სიზუსტით კომპონენტების კონცენტრაციის განსაზღვრის მეთოდიკა, მათი წინასწარი დაცილების გარეშე. დეპარტამენტის სამეცნიერო თემატიკაში აღსანიშნავია სამუშაოები, რომლებიც ეხება ამორფული მასალებისა და საფარების შესწავლას. გრძელდება სამუშაოები ახალი სახის მინიმასალების მიღების მიმართულებით და სუსპენზიებში თვითშეწონვის ბუნების შესწავლა.
დეპარტამენტში მიმდინარეობს არომატული და ჰეტეროარომატული ნაერთების საფუძველზე სინთეზური საღებრების სინთეზი, თვისებების შესწავლა და გამოყენება.
წარმატებით ხორციელდება კვლევები ღიაჯაჭვიანი და მაკროციკლური ახალი აზომეთინური ნაერთებისა და მათ საფუძველზე ლუმინოფორული საღებრების სინთეზისა და გამოყენების მიმართულებით. ასევე მნიშვნელოვანია სამუშაოები ამორფული მასალებისა და საფარების შესწავლის კუთხით.
სამეცნიერო თემატიკა „ფოლადის კონსტრუქციების კოროზიისაგან დაცვა“ ეხმიანება საქართველოს ენერგეტიკული პოლიტიკის მიზნებს – მდგრადი განვითარება, გადაზიდვების კონკურენტუნარიანობა და გამართულობა. გაზისა და ნავთობსადენი სისტემების უსაფრთხოების უზრუნველსაყოფად შექმნილია ახალი ერთშრიანი დამცავი დანაფარების თანამედროვე სისტემა მსოფლიოში აღიარებული დასმის „Direct” ტექნოლოგიისათვის, რომელიც 10–ჯერ ზრდის მილსადენების საექსპლუატაციო ვადას. საყოფაცხოვრებო ტექნიკისათვის შექმნილია ახალი დეკორატიული დაბალტემპერატურული ერთშრიანი უგრუნტო დანაფარები, ხოლო ქიმიური რეაქტორებისათვის – მჟავა-ტუტე მედეგი მრავალპროფილური კომპლექსი და მათი მიღების რენტაბელური ტექნოლოგია (პროფ. ი. ბერძენიშვილი).
მიმდინარეობს სამუშაოები ქიმიის სწავლების მეთოდოლოგიის დახვეწისა და ქიმიის ისტორიის შესწავლის მიმართულებით.
დეპარტამენტის თანამშრომლების მიერ თანამედროვე მოთხოვნების გათვალისწინებით დაიხვეწა და შეიქმნა ახალი სახელმძღვანელოები, დამხმარე მეთოდური მასალა; შემუშავდა და დაინერგა ვირტუალური პროგრამები, რომლებიც ადაპტირებულია სწავლების პირისპირ, ჰიბრიდულ და დისტანციურ პირობებთან.
დეპარტამენტს აქვს მჭიდრო კავშირები სხვადასხვა საერთაშორისო სასწავლო სამეცნიერო ცენტრებთან: რუსეთის მეცნიერებათა აკადემიის ნ.კურნაკოვის სახელობის ზოგადი და არაორგანული ქიმიის ინსტიტუტთან, კიევის ტ. შევჩენკოს სახელობის სახელმწიფო უნივერსიტეტთან, ბაქოს სახელმწიფო უნივერსიტეტთან, მოსკოვის დ. მენდელეევის სახელობის ქიმიური ტექნოლოგიის აკადემიის ორგანული ქიმიის კათედრასთან, ამავე აკადემიის შუალედური პროდუქტებისა და საღებრების კათედრასთან, მოსკოვის ორგანული შუალედური პროდუქტებისა და სამეცნიერო-კვლევით ინსტიტუტთან, ბაქოს ნავთობის ინსტიტუტის ორგანული ქიმიის კათედრასთან და ჩეხეთის ქალაქ პარდუბიცის საღებრების ინსტიტუტთან.
დეპარტამენტის აკადემიური პერსონალი აქტიურად მონაწილეობს საერთაშორისო სასწავლო-სამეცნიერო კონფერენციებსა და სიმპოზიუმებში. 2018 წელს დეპარტამენტის ეგიდით ჩატარდა საქართველოს მეცნიერებათა ეროვნული აკადემიის აკადემიკოსის, ქიმიის მეცნიერებათა დოქტორის, პროფესორ გ. ცინცაძის დაბადების 85 წლისადმი მიძღვნილი სამეცნიერო-მეთოდური კონფერენცია. კონფერენციის მუშაობაში აქტიური მონაწილეობა მიიღეს საქართველოსა და საზღვარგარეთის სამეცნიერო ცენტრებისა და უნივერსიტეტების თანამშრომლებმა, ზოგადსაგანმანათლებლო სკოლების პედაგოგებმა.