გარემოსდაცვითი ინჟინერიისა და ეკოლოგიის დეპარტამენტის დაარსების 45-ე წლისთავი სტუ-ში
საქართველოს ტექნიკურ უნივერსიტეტში პროფესორ ვიქტორ ერისთავის სახელობის გარემოსდაცვითი ინჟინერიისა და ეკოლოგიის დეპარტამენტის დაარსების 45-ე წლისთავი ვორქშოფით აღინიშნა. ღონისძიება აგრარული მეცნიერებისა და ქიმიური ტექნოლოგიების ფაკულტეტზე გაიმართა და სამრეწველო ნარჩენების მართვის თანამედროვე პრაქტიკებს დაეთმო.
ვორქშოფში სტუდენტები, უნივერსიტეტის მკვლევრები და პროფესორ-მასწავლებლები, სფეროს ექსპერტები, ინდუსტრიების წარმომადგენლები და სპეციალისტები მონაწილეობდნენ. ღონისძიების მხარდამჭერები კომპანიები - RMG-ი და WasteLess-ი იყვნენ.
ვორქშოპი აგრარული მეცნიერებისა და ქიმიური ტექნოლოგიების ფაკულტეტის დეკანმა გახსნა. მან საქართველოს ტექნიკური უნივერსიტეტის რექტორის, აკადემიკოს დავით გურგენიძის სახელით მადლობა გადაუხადა პროფესორ ვიქტორ ერისთავის სახელობის გარემოსდაცვითი ინჟინერიისა და ეკოლოგიის დეპარტამენტის აკადემიურ პერსონალსა და მეცნიერებს იმ დიდი ღვაწლისათვის, რაც ათწლეულების მანძილზე გარემოსდამცველთა აღზრდას და გარემოს დაცვის მიმართულებით კვლევების განხორციელებას უკავშირდება.
პროფესორმა ლიანა თარგამაძემ თავის გამოსვლაში ყურადღება გაამახვილა იმ გლობალურ და რეგიონულ გარემოსდაცვით გამოწვევებზე, რომელთა წინაშეც თანამედროვე მსოფლიო დგას, მათ შორის - სამრეწველო ნარჩენების მართვის, ბუნებრივი რესურსების მდგრადი გამოყენებისა და ეკოსისტემების დაცვის მნიშვნელობაზე.
ვორქშოფის ფარგლებში, სტუდენტებისთვის თანამედროვე ვეისტ მენეჯმენტის შესახებ საჯარო ლექციები ჩაატარეს სფეროს პროფესიონალებმა. კომპანია RMG-ის გარემოსდაცვითმა მმართველმა კონსტანტინე ხაჭაპურიძემ ნარჩენების მართვის თანამედროვე მიდგომების შესახებ ისაუბრა, ხოლო კომპანია WasteLess-ის დამფუძნებელმა და ხელმძღვანელმა გიორგი გულიაშვილმა სპეციფიური ნარჩენების მართვის მნიშვნელოვანი საკითხები განიხილა.
ვორქშოფის მონაწილეთა წინაშე შემაჯამებელი სიტყვით წარსდგა აგრარული მეცნიერებისა და ქიმიური ტექნოლოგიების ფაკულტეტის გარემოსდაცვითი ინჟინერიისა და ეკოლოგიის დეპარტამენტის ხელმძღვანელი. პროფესორმა დიმიტრი ერისთავმა მადლობა გადაუხადა საქართველოს ტექნიკური უნივერსიტეტის რექტორსა და ადმინისტრაციას დეპარტამენტის დაარსების 45-ე წლისთავისადმი მიძღვნილი ღონისძიების მხარდაჭერისთვის და აღნიშნა, რომ მსგავსი ინიციატივები ხელს უწყობს აკადემიურ და პროფესიულ სივრცეებს შორის კავშირის გაღრმავებას.
პროფესორმა განსაკუთრებული ყურადღება გაამახვილა პარტნიორ ორგანიზაციებთან მჭიდრო თანამშრომლობის მნიშვნელობაზე როგორც განათლების ხარისხის ამაღლების, ისე გამოყენებითი კვლევების განვითარების კუთხით, ასევე ისაუბრა სამომავლო ერთობლივი პროექტების, ინოვაციური კვლევებისა და სტუდენტებისთვის პრაქტიკული გამოცდილების გაფართოების ძირითად მიმართულებებზე.
ვორქშოფის - „სამრეწველო ნარჩენების მართვის თანამედროვე პრაქტიკაში გამოყენება“ - ფარგლებში, ღონისძიების მონაწილე სტუდენტებისთვის RMG-ის ტერიტორიაზე მოეწყო სპეციალური ტური, რომელზეც კომპანიის სპეციალისტებმა ახალგაზრდებს საწარმოო პროცესების შედეგად წარმოქმნილი სამრეწველო და სახიფათო ნარჩენის მართვის მეთოდები გააცნეს.