19/05/2026
პროფესორი თინა იაშვილი ევროპის კვირეულის (Europe Week) ღონისძიებაში მონაწილეობდა
ვიზიტის ფარგლებში, პროფესორმა იაშვილმა HTW Saar-ის ბიზნეს ადმინისტრირების საბაკალავრო პროგრამის სტუდენტებისთვის ციფრულ მარკეტინგში ინტერაქტიული ლექციები ჩაატარა. ლექციები თანამედროვე ციფრული მარკეტინგის პრაქტიკულ ასპექტებს, საერთაშორისო ქეისებსა და ინდუსტრიის მიმდინარე ტენდენციებს შეეხებოდა. სტუდენტები აქტიურად მონაწილეობდნენ დისკუსიებში და მრავალ გამოცდილებაზე დაფუძნებულ შეკითხვებს სვამდნენ, რამაც შექმნა ძალიან საინტერესო და ჩართული აკადემიური გარემო.
საერთაშორისო კვირეულის ფარგლებში, ასევე, გაიმართა უნივერსიტეტების გამოფენა,სადაც საქართველოს ტექნიკურმა უნივერსიტეტმა საკუთარი საგანმანათლებლო შესაძლებლობები, საერთაშორისო აქტივობები, ფაკულტეტებისა და პროგრამების შესახებ ინფორმაცია წარადგინა. სტუ-ის სტენდმა მნიშვნელოვანი ინტერესი გამოიწვია როგორც სტუდენტების, ასევე, აკადემიურ პერსონალის მხრიდან, რომლებიც დაინტერესდნენ საერთაშორისო თანამშრომლობისა და მობილობის შესაძლებლობებით.
ვიზიტის მნიშვნელოვანი ნაწილი დაეთმო Erasmus+ თანამშრომლობის გაგრძელებისა და გაფართოების საკითხებზე შეხვედრებს საქართველოს ტექნიკურ უნივერსიტეტსა და HTW Saar-ს შორის. Erasmus+ კოორდინაციის შეხვედრების ფარგლებში გერმანულმა მხარემ დაადასტურა, რომ HTW Saar-მა საქართველოს ტექნიკურ უნივერსიტეტთან თანამშრომლობის მიზნით ახალი Erasmus+ განაცხადი უკვე წარადგინა. განაცხადის შედეგები 2026 წლის ივლისში გახდება ცნობილი. გერმანულმა პარტნიორებმა გამოხატეს ძლიერი ინტერესი სტუ-თან თანამშრომლობის კიდევ უფრო გაღრმავების მიმართ და აგრძელებენ მნიშვნელოვანი ინსტიტუციური და ფინანსური მხარდაჭერის გაწევას ერთობლივი საერთაშორისო ინიციატივებისა და აკადემიური მობილობისთვის.
შეხვედრების კიდევ ერთი მნიშვნელოვანი შედეგია 2026 წლის ოქტომბერში, საქართველოს ტექნიკურ უნივერსიტეტში HTW Saar-ის დაახლოებით 15 სტუდენტის ვიზიტი. თბილისში ყოფნის პერიოდში სტუდენტები დაესწრებიან ლექციებს, გაეცნობიან სტუ-ის საგანმანათლებლო სისტემას, ასევე, საქართველოსა და მისი დედაქალაქის კულტურულ და აკადემიურ გარემოს.