სტუ-ის სტუდენტებმა პროფესიული პრაქტიკა გერმანიაში, პროფესორ კლაუს ჰიპის მხარდაჭერით გაიარეს
21 სექტემბრიდან 21 ოქტომბრამდე, საქართველოს ტექნიკურ უნივერსიტეტსა და გერმანულ კომპანია HiPP-ს შორის გაფორმებული თანამშრომლობის მემორანდუმის ფარგლებში, ცნობილი გერმანელი მეწარმისა და მეცენატის, სტუ-ის საპატიო დოქტორის, პროფესორ კლაუს ჰიპის მხარდაჭერით, ორმა სტუდენტმა გერმანიაში პროფესიული პრაქტიკა გაიარა.
გერმანიაში, ქალაქ შაიერნში (Scheyern), პროფესიულ პრაქტიკაზე საქართველოს ტექნიკური უნივერსიტეტის არქიტექტურის, ურბანისტიკისა და დიზაინის ფაკულტეტის სტუდენტი მარიამ სულაბერიძე და დიზაინის საერთაშორისო სკოლის კურსდამთავრებული ელისაბედ გუნთიშვილი იმყოფებოდნენ.
პრაქტიკას ხელმძღვანელობდა საქართველოს ტექნიკური უნივერსიტეტის ტექნოლოგიებისა და საგრანტო პროექტების ოფისის ხელმძღვანელის მოადგილე ნინო ახობაძე, რომელიც უშუალოდ იყო ჩართული სტუდენტების პროფესიული საქმიანობის კოორდინაციასა და სამუშაო პროცესის წარმართვაში.
პრაქტიკა მიზნად ისახავდა სტუდენტების პროფესიული უნარების განვითარებას, საერთაშორისო გამოცდილების მიღებასა და შემოქმედებითი შესაძლებლობების რეალიზებას.
პროექტი განსაკუთრებული იყო იმით, რომ სტუდენტებს შესაძლებლობა მიეცათ, მრავალსაუკუნოვანი ისტორიის მქონე კულტურული მემკვიდრეობის სივრცეში ემუშავათ, სადაც თანამედროვე დიზაინის მიდგომები ისტორიული გარემოსა და არქიტექტურული მემკვიდრეობის გათვალისწინებით უნდა ყოფილიყო გამოყენებული.
პრაქტიკის განმავლობაში სტუდენტები მუშაობდნენ ინტერიერის მხატვრულ კონცეფციაზე, სივრცის ესთეტიკურ გადაწყვეტასა და დიზაინის ცალკეულ ელემენტებზე. მიღებულმა გამოცდილებამ მათ საშუალება მისცა, თეორიული ცოდნა რეალურ სამუშაო გარემოში გამოეყენებინათ და გაცნობოდნენ გერმანულ პროფესიულ პრაქტიკას.
პროექტის განხორციელებაში მნიშვნელოვანი წვლილი შეიტანეს შაიერნის ბენედიქტელთა მონასტრის სასულიერო პირებმა, რომლებმაც სტუდენტებსა და პრაქტიკის ხელმძღვანელს განსაკუთრებული სტუმართმოყვარეობა, მხარდაჭერა და სამუშაო პროცესში აქტიური დახმარება გაუწიეს. მონასტრის მხრიდან უზრუნველყოფილი იყო შესაბამისი სამუშაო პირობები და ორგანიზაციული ხელშეწყობა, რამაც მნიშვნელოვანი როლი ითამაშა პრაქტიკის წარმატებით განხორციელებაში.
სტუდენტების გერმანიაში პროფესიული პრაქტიკის ორგანიზება და კოორდინაცია საქართველოს ტექნიკური უნივერსიტეტის ტექნოლოგიებისა და საგრანტო პროექტის ოფისმა უზრუნველყო.