RMG-ის საზაფხულო სკოლის 2026 წლის შემაჯამებელი ღონისძიება

მადნეულის ისტორიულ კარიერზე RMG-ის საზაფხულო სკოლის 2026 წლის შემაჯამებელი ღონისძიება გაიმართა. პროექტმა წელს 31 მონაწილეს უმასპინძლა, მათ შორის საქართველოს ტექნიკური უნივერსიტეტის, თბილისის სახელმწიფო უნივერსიტეტისა და საერთაშორისო სამაგისტრო პროგრამა TIMREX-ის (T-Shaped Master Programme for Innovative Mineral Resource Exploration) უცხოელ სტუდენტებს. 

საზაფხულო სკოლის ფარგლებში მონაწილეებს შესაძლებლობა ჰქონდათ,  თეორიული ცოდნა გაეღრმავებინათ და პრაქტიკული გამოცდილება სამთო ინდუსტრიის მიმართულებით მიეღოთ.  პროგრამა მოიცავდა როგორც საგანმანათლებლო, ისე პრაქტიკულ და საველე აქტივობებს.

შემაჯამებელ ღონისძიებაზე სტუდენტებმა ჯგუფური პრეზენტაციები წარადგინეს და პროგრამის ფარგლებში მიღებული ცოდნა, გამოცდილება და შესრულებული სამუშაოები შეაჯამეს. 

ღონისძიების ფარგლებში, RMG-ის გენერალურმა დირექტორმა ჯონი შუბითიძემ, საქართველოს ტექნიკური უნივერსიტეტის პროფესორ-მასწავლებლებთან ერთად, საზაფხულო სკოლის წარმატებით დასრულებისთვის მონაწილეებს სერტიფიკატები და სამახსოვრო საჩუქრები გადასცა. 

საქართველოს ტექნიკური უნივერსიტეტის სამთო-გეოლოგიური და მთის მდგრადი განვითარების ფაკულტეტის სტუდენტების მონაწილეობა  პროგრამაში მნიშვნელოვანი შესაძლებლობაა პროფესიული ცოდნის პრაქტიკაში გამოყენებისა და სამთო ინდუსტრიის წარმომადგენლებთან ურთიერთობისთვის.

ფაკულტეტი მომავალშიც აქტიურად გააგრძელებს სტუდენტებისთვის ისეთი საგანმანათლებლო და პრაქტიკული შესაძლებლობების მხარდაჭერას, რომლებიც მათ პროფესიულ განვითარებასა და ინდუსტრიასთან კავშირის გაძლიერებას  ხელს შეუწყობს.