სტუ-ში, რექტორის, აკადემიკოს დავით გურგენიძის პატრონაჟით, საქართველოს სამთო საზოგადოების ყრილობა გაიმართა

საქართველოს ტექნიკურ უნივერსიტეტში, რექტორის, აკადემიკოს დავით გურგენიძის ინიციატივითა და პატრონაჟით, საქართველოს სამთო საზოგადოების ყრილობა გაიმართა, რომელსაც დარგში მოღვაწე მეცნიერები, ექსპერტები, კერძო სექტორის წარმომადგენლები და სტუმრები, საერთო ჯამში, 700-მდე მეტი პირი ესწრებოდა. 

სამთო საზოგადოების ყრილობას მისასალმებელი სიტყვით მიმართა საქართველოს ტექნიკური უნივერსიტეტის რექტორმა. როგორც აკადემიკოსმა დავით გურგენიძემ განაცხადა, სამთო ინჟინერია არის დარგი, რომელსაც ქვეყნის ეკონომიკის აღორძინებაში დიდი წვლილი მიუძღვის, ხოლო სამთო საზოგადოება არის ძალა, რომელსაც შესწევს უნარი, მდგრადი განვითარების პირობებში, მოსახლეობის კეთილდღეობა უზრუნველყოს.

„სამთო ინჟინერია პრიორიტეტული მიმართულებაა, რომლის განვითარება ქვეყნის მდგრადი და მზარდი ეკონომიკის ერთ-ერთი საფუძველია. საქართველოს ტექნიკური უნივერსიტეტი არის ერთადერთი უმაღლესი სკოლა, რომელიც დარგს სპეციალისტებით უზრუნველყოფს და არა მხოლოდ ჩვენი ქვეყნისთვის ზრდის მაღალკვალიფიციურ სამთოელებსა და გეოლოგებს. წლების განმავლობაში კერძო სექტორი ღიად საუბრობდა სპეციალისტების ნაკლებობაზე, რაც ერთ-ერთი მტკივნეული საკითხი იყო. 90-იან წლებში განვითარებული სოციალურ-ეკონომიკური და პოლიტიკური კრიზისის პერიოდი სავალალოდ აისახა ამ დარგზეც, თუმცა ჩვენ შევძელით შეგვენარჩუნებინა და თანამედროვე მოთხოვნების შესაბამისად განგვევითარებინა ფაკულტეტი. დიდია პირადად ბატონი ბიძინა ივანიშვილის, მთავრობის მეთაურის, ბატონი ირაკლი კობახიძის და ხელისუფლების წვლილი ფაკულტეტის და, შესაბამისად, ქვეყანაში ამ მეტად საჭირო დარგის აღორძინება-განვითარებაში. ამის ნათელი დადასტურებაა ისიც, რომ წელს ეროვნული გამოცდებით სამთო-გეოლოგიურ ფაკულტეტზე ჩარიცხულთა რაოდენობა უპრეცედენტოდ მაღალი იყო. 

მადლობა მინდა გადავუხადო კერძო სექტორის წარმომადგენლებს, განსაკუთრებული მადლობა „არემჯის” ხელმძღვანელობას. ჩვენ ერთად უნდა განვავითაროთ დარგი, რომლის წინსვლისთვის აუცილებელია მეცნიერ-მკვლევრებისა და კერძო სექტორის ერთობლივი ძალისხმევა. აღნიშნულის მიღწევა შესაძლებელია ბოლო წლებში ეკონომიკის მკვეთრი აღმავლობის ფონზე. დღეს ჩვენს ქვეყანაში ეკონომიკა არნახული ტემპით იზრდება, შესაბამისად, ყველა საშუალება გვაქვს მეტ წარმატებას მივაღწიოთ. მეტი წარმატება ჩვენს მომავალ თაობას უკეთესი ცხოვრების გარანტიას აძლევს. 

სამთო საზოგადოების ყრილობაზე შეუძლებელია არ გავიხსენოთ ადამიანები, რომელთაც დიდი წვლილი შეიტანეს სამთო საქმის განვითარებაში. დღეს ჩვენ გვერდით აღარ არიან მეცნიერები და ღვაწლმოსილი სამთოელები - სამთო საზოგადოების ყოფილი პრეზიდენტი რევაზ სტურუა, ლევან მახარაძე, გურამ ვარშალომიძე. დიდი მეცნიერის, არჩილ ძიძიგურის მიერ დაფუძნდა სამთო საზოგადოება, რომლის გზა ბორის დემეტრაძემ გააგრძელა. მისი თაოსნობით საზოგადოება არჩილ ძიძიგურის სახელს ატარებს. სასიხარულოა, რომ ამ მეცნიერთა გაკვალულ გზას წარმატებით აგრძელებენ მათი მოწაფეები. წარმატებები მინდა ვუსურვო სამთო საზოგადოებას და მომავალ სამთოელებს”, - აღნიშნა თავის გამოსვლაში დავით გურგენიძემ. 

სამთო საზოგადოების პრეზიდენტის თქმით, დარგი ვითარდება, იზრდება და ძლიერდება. როგორც პროფესორმა ირაკლი გუჯაბიძემ აღნიშნა: „სამთო საზოგადოების ამოცანაა, მაქსიმალურად შეუწყოს ხელი სამთო დარგის განვითარებას. იზრდება სამეცნიერო წრეებთან, პრაქტიკოსებთან და შესაბამის სამთავრობო სტრუქტურებთან კავშირები. ჩვენ ერთად ვმსჯელობთ დარგში არსებული პრობლემების გადაჭრის შესახებ. ჩვენ მზად ვართ დავეხმაროთ კერძო სექტორს თანამედროვე ტექნოლოგიების დანერგვაში, კადრების მომზადებასა და გადამზადებაში. ხაზგასმით მინდა აღვნიშნო, რომ ჩვენი თითოეული აქტივობა ხორციელდება საქართველოს ტექნიკური უნივერსიტეტის რექტორის, აკადემიკოს დავით გურგენიძის პატრონაჟით, რისთვისაც მას მადლობას მოვახსენებ”, - აღნიშნა ირაკლი გუჯაბიძემ.

სამთო საზოგადოების ყრილობის დელეგატებს მისასალმებელი სიტყვით მიმართეს სამთო ინსტიტუტის დირექტორმა ნიკოლოზ ჩიხრაძემ, აკადემიკოსმა ლევან ჯაფარიძემ, RMG-ის გენერალურმა დირექტორმა ჯონი შუბითიძემ, „საქნახშირის“ გენერალურმა დირექტორმა მიხაილ სოცკიმ, სტუ-ის სამთო-გეოლოგიური ფაკულტეტის დეკანმა, პროფესორმა ანზორ აბშილავამ, პროფესორებმა - ალექსანდრე ბეჟანიშვილმა და ნოდარ ფოფორაძემ. 

ღონისძიების დასასრულს, საქართველოს ტექნიკური უნივერსიტეტის სტუდენტური შემოქმედებითი ჯგუფების კონცერტი გაიმართა, რომელშიც ქორეოგრაფიული ანსამბლი “მერანი“, ფოლკლორული ჯგუფი “ფესვები“ და გოგონათა ვოკალურ-ინსტრუმენტული ანსამბლი “ქალდეა“ მონაწილეობდნენ.