საქართველოს ტექნიკური უნივერსიტეტის
ინფორმატიკისა და მართვის სისტემების ფაკულტეტის საბჭოს

დადგენილება

1. განათლების რეფორმის ღონისძიებების გატარებასთან დაკავშირებით, სტუ-ს ინფორმატიკისა და მართვის სისტემების ფაკულტეტის პროფესორ-მასწავლებელთა სამეცნიერო პედაგოგიური კვალიფიკაციის დონის ამაღლების მიზნით, სასწავლო პროცესის ხარისხის შემდგომი სრულყოფისათვის დაფუძნდეს ფაკულტეტის სამეცნიერო-ტექნიკური შრომების კრებული (პერიოდული ჟურნალი) "მართვის ავტომატიზებული სისტემები", რომელშიც ასახული იქნება როგორც ფაკულტეტის თანამშრომელთა, ასპირანტ-დოქტორანტთა და მაგისტრანტთა სამეცნიერო-კვლევითი მუშაობის შედეგები, ასევე საქართველოს და საზღვარგარეთის უნივერსიტეტთა ინფორმატიკის სფეროს მეცნიერთა სამეცნიერო სტატიები;
2. დაევალოს ჟურნალის შექმნის საორგანიზაციო ჯგუფს: /პრორექტორი პროფ. ა. ფრანგიშვილი (თავმჯდომარე), დეკანი პროფ. ზ. წვერაიძე, მართვის ავტომატიზებული სისტემების კათედრის გამგე, პროფ. გ. გოგიჩაიშვილი (თავმჯდომარის მოადგილე) და პროფ. გ. სურგულაძე (პასუხისმგებელი შემსრულებელი) / - ორგანიზაციული საკითხების მოგვარება საერთაშორისო სტანდარტული ISSN პერიოდული კოდის მისაღებად;
3. დამტკიცდეს რედკოლეგიის შემადგენლობა (რედკოლეგია);
4. დამტკიცდეს ჟურნალის დებულება (დებულება);
5. ჟურნალში სამეცნიერო სტატიების წარმოდგენის ენა: ქართული, რუსული, ინგლისური, გერმანული და ფრანგული. რეზიუმეები აუცილებელია სამ ენაზე (ქართულ, რუსულ და ინგლისურზე).
6. განისაზღვროს ჟურნალის პერიოდულობა: არანაკლებ 2-ჯერ წელიწადში და ტირაჟი 100-:-300 ეგზემპლარი;
7. განთავსდეს ჟურნალის სტატიების რეზიუმეები (ქართულ, რუსულ და ინგლისურ ენებზე) ინფორმატიკისა და მართვის სისტემების ფაკულტეტის ვებ-გვერდზე.