თბილისის გრან პრი

19-03-2015
საქართველოს ძიუდოს ნაკრების წევრების შეხვედრა ტექნიკური უნივერსიტეტის სტუდენტებთან

18 მარტს საქართველოს ტექნიკური უნივერსიტეტის სააქტო დარბაზში ძიუდოს ნაკრების წევრები ავთანდილ ჭრიკიშვილი, ვარლამ ლიპარტელიანი, ლაშა შავდათუაშვილი და ფედერაციის პრეზიდენტი დავით ქევხიშვილი სტუდენტებს შეხვდნენ.

შეხვედრის მიზანი იყო გრან პრის შესახებ ინფორმაციის მიწოდება სტუდენტებისთვის, რათა გაიზარდოს დამსწრეთა რაოდენობა ტურნირზე, რაც ხელს შეუწყობს აღნიშნული ტურნირისა და სპორტის სახეობის პოპულარიზაციას. აღსანიშნავია, რომ 20-22 მარტს თბილისის სპორტის სასახლე ძიუდოში პრესტიჟულ საერთაშორისო ტურნირს - თბილისის გრან პრის მეორედ უმასპინძლებს. 

თბილისის გრან პრიზე მსოფლიოს 45 ქვეყნის 400-მდე უძლიერესი სპორტსმენები მიიღებენ მონაწილეობას მამაკაცთა და ქალთა შორის, ჩემპიონები 7-7 წონით კატეგორიაში გამოვლინდებიან. 

ქართველი ძიუდოისტები თბილისის გრან პრიზე საუკეთესო შემადგენლობით გამოვლენ. მედლებისათვის იბრძოლებენ ოლიმპიური, მსოფლიოს და ევროპის ჩემპიონები, ტიტულოვანი სპორტსმენები - ავთანდილ ჭრიკიშვილი, ლაშა შავდათუაშვილი, ვარლამ ლიპარტელიანი, ამირან პაპინაშვილი, ნუგზარ ტატალაშვილი, ზებედა რეხვიაშვილი, ადამ ოქრუაშვილი და სხვა. ჯამში ტურნირზე მამაკაცთა შორის 28 ქართველი ძიუდოისტი იჭიდავებს, ქალთა შორის კი მედლისათვის ელენე ლეონიძე იბრძოლებს.

გრან პრის ფინალურ ორთაბრძოლებს პირდაპირ ეთერში 17:00 საათიდან საქართველოს საზოგადოებრივი მაუწყებლის პირველი არხი გადასცემს. წინასწარი შეხვედრები 10:00 საათიდან დაიწყება. 20 მარტს, 16:25 საათზე, გაიმართება გახსნის ოფიციალური ცერემონიალი. 

გრან პრიზე დასწრება გულშემატკივრებისათვის უფასოა.

 

სიახლეებში დაბრუნება

ბანერები